Израелскиот премиер Бенјамин Нетанјаху изјави дека интензивната фаза од војната со Хамас во Газа е при крај и дека фокусот на војската сега може да се префрли на северната граница на Израел со Либан, каде што се водат борби со Хезболах.
Нетанјаху, сепак, вети дека Израел ќе продолжи со своите активности во Газа додека Хамас не биде елиминиран. „Ова не значи дека војната ќе заврши, туку дека ќе ставиме крај на сегашната фаза на конфликтот во Рафа. Тоа е вистината. Ќе продолжиме со косење трева подоцна“, рече Нетанјаху на телевизијата Канал 14.
Повеќе од милион Палестинци се засолниja во Рафа пред Израел да започне воздушна и копнена операција во градот. Оттогаш, околу 800.000 луѓе се раселени од Рафа, пишува CNN.
Во меѓувреме, меѓународниот притисок врз Израел се зголеми. Минатиот месец, највисокиот суд на ОН му нареди на Израел веднаш да ја прекине контроверзната воена операција во Рафа, велејќи дека хуманитарната ситуација во областа е катастрофална.
Нетанјаху рече дека е подготвен да направи делумен договор со Хамас за враќање на некои заложници, но нагласи дека војната по прекинот на огнот ќе продолжи се додека Хамас не биде елиминиран. „Немам намера да се откажам од тоа“, рече тој.
Во Израел започнаа протести со барање за прекин на огнот во Газа и враќање на сите заложници. Планот за трифазен прекин на огнот, поддржан од САД, предлага „траен прекин на воените дејствија, во замена за ослободување на сите други заложници се уште во Газа и целосно повлекување на израелските сили од Газа“.
Се чини дека се продлабочуваат и несогласувањата меѓу израелската влада и нејзината војска. Нетанјаху е под зголемен притисок од членовите на неговата влада и сојузниците на Израел, вклучително и Соединетите држави, да изготват план за повоено управување со Газа по разорното бомбардирање на енклавата од страна на Израел.
Хамас брзо реагираше на коментарите на израелскиот премиер, велејќи дека неговите зборови покажуваат дека сака само делумен договор, а не крај на војната во Газа.
„Ставовите на Нетанјаху јасно потврдуваат дека тој всушност ги отфрла неодамнешните резолуции на Советот за безбедност и предлогот на американскиот претседател Џо Бајден“, се вели во соопштението на Хамас. Групата продолжува да инсистира дека договорот вклучува јасна потврда за траен прекин на огнот и целосно повлекување на израелската војска од Појасот Газа.
Нетанјаху вчера изјави дека по завршувањето на интензивната фаза во Газа ќе префрли дел од силите на север. „Прво за заштита, а потоа да ги вратиме нашите жители дома. Ако можеме да го направиме тоа политички, тоа би било одлично. Ако не, ќе го направиме тоа на друг начин. Ќе ги вратиме дома сите жители на северот и на југ“, додаде тој.
Хезболах, исламистичко движење поддржано од Иран, извршува смртоносни напади од јужен Либан насочени кон области во северен Израел од 8 октомври, по нападот на Хамас врз Израел. Израел одговори и во нападите врз Хезболах уби милитанти на таа група, меѓу кои и високи команданти. Поради конфликтот на северот на Израел, десетици илјади Израелци беа евакуирани.
Израелските власти им кажаа на САД дека планираат да префрлат ресурси од јужна Газа во северен Израел за да се подготват за можна офанзива против Хезболах. Импликациите од пошироката војна меѓу Израел и Хезболах може да бидат поразителни, изјави висок американски функционер претходно за Си-Ен-Ен.
Имено, американските власти се сериозно загрижени дека во случај на сеопфатна војна меѓу Израел и Хезболах, милитантната група поддржана од Иран би можела да ја совлада воздушната одбрана на Израел, вклучително и фалениот систем за воздушна одбрана „Железна купола“.
Овој страв на американските власти им го пренесе самиот Израел. Имено, Железната купола би можела да биде ранлива на огромниот арсенал на ракети и беспилотни летала на Хезболах. „Проценуваме дека барем некои од батериите на Iron Dome ќе бидат преоптоварени“, изјави висок израелски функционер.
Тој додаде дека тоа може да се случи доколку Хезболах започне напад од големи размери користејќи прецизно наведувано оружје. Хезболах со години складира прецизно наведувана муниција и проектили од Иран, за што Израел постојано изразува загриженост.