Директорот на Фондот за здравствено осигурување на Македонија, Маја Парнарџиева Змејкова се сретна со европарламентарците Тања Фајон и Кнут Флекенштајн, како и со Михаел Шнатц од АСБ, Сојузно здружение од Германија, оддел за меѓународна помош. На средбата присуствуваше и Александар Митов, советник за здравство на претседателот на Владата.
Целта на средбата, соопшти ФЗОМ, беше презентирање на активностите што ги презема германското сојузно здружение АСБ, кое има 200 подрачни канцеларии на територијата на цела Германија, како и канцеларии ширум светот. Минатата година биле искористени 160 милиони евра за проекти кои се одвивале на Балканот, како на пример, за зајакнување на мрежа на социјални провајдери на Балканот. Македонија, како што се наведува, е следна земја со која се планира да се почне соработка.
Директорката на ФЗОМ предложи да се земат предвид неколку теми пред следниот состанок, како што се: доставување список на здруженија на граѓани – пациенти, со кои ФЗОМ има одлична соработка, како потенцијални локални партнери за соработка за Балканската мрежа, (ФЗОМ понуди помош и простор при организирање состанок со овие здруженија на граѓани), подигнување на свеста за важноста од превентивна здравствена грижа, влијанието од загадувањето врз здравјето и одговорноста на поединецот да ја чува животната средина.
На средбата стана збор и за превентивни мерки особено кај социјално загрозените граѓани, како начин да се подобри благосостојбата на оваа категорија граѓани. Од ФЗОМ укажаа на потребата да се размисли и за соработка во делот со репродуктивното здравје на граѓаните. Иницијативата за соработка беше прифатена од двете страни и беше договорено на следниот состанок да се утврди поконкретно кои ќе бидат модалитетите на заедничката соработка, стои во соопштението.