Жител на Табановце физички нападнал вработен во отсекот за управни работи во Куманово, соопшти полицијата.
Инцидентот се случил вчера, кога четириесет и двегодишниот жител на кумановското село Табановце Н.П. го нападнал вработениот во просториите на отсекот за управни работи – Куманово.
Според информациите на А1он, напаѓачот влегол во просторијата каде се вадат лични документи, додека вработениот веќе имал други странки. Но тој бил нетрпелив и во стилот „само да прашам нешто “, се обидел да го прекине вработениот. Вработениот не му дозволил и му рекол да излезе и да почека да заврши со странките. По што 42 годишниот жител на Табановце влегол внатре и физички го нападнал вработениот.
МВР го потврди настанот.
„ Вчера во 10:25 часот, полициски службеници од СВР Куманово го лишиле од слобода Н.П.(42) од село Табановце, Кумановско затоа што во просториите на отсекот за управни работи Куманово физички нападнал еден вработен, кој извршувал службени дејствија. Н.П. бил приведен во полициска станица и по целосно документирање на случајот против него ќе следува соодветна пријава, велат од МВР.
Согласно законот напаѓачот ќе одговара за напад на службено лице при вршење на службени дејствија, што е сериозно кривично дело.
Претходната недела СВР Куманово информираше дека Одделението за управни работи – Куманово од почетокот на годинава издало над 10.500 пасоши, над 9.000 лични карти и над 4.000 возачки дозволи.
Одделението работи со четири кабини за фотографирање и работи во две смени, од 7:30 до 19:30 часот.