Користољубие, односно изнуда на пари според Обвинителството е мотивот поради кои осомничените ја убиле 14 годишната Вања Ѓорчевска од Скопје. Иако ова е мотивот кој го соопштија од ОЈО, сепак грабнувачите го убиле девојчето неколку часа откако ја киднапирале, односно околу 10 часот.
Засега од петмината осомничени, тројцата приведени ќе бидат однесени пред судија на претходна постапка, кој треба да им определи мерка притвор. Едно лице пак, е надвор од Македонија.
Истите лица се сомничат и за убиството на 74 годишниот бербер од Велес, Панче Жежовски.
„Од спроведените истражни дејствија утврдено е дека и двете убиства се извршени од истите лица, чиј мотив е „користољубие“. Исто така, од реализираните оперативни мерки е утврдено дека малолетничката В.Ѓ. е земена со возило од влезот на живеалиштето, а од обезбедените информации од распитот утврдено е дека била убиена истиот ден (27.11.2023) околу 10 часот“, стои во соопштението на ОЈО.
Од таму додаваат и дека се издадени наредби за обдукции на телата на жртвите, а ќе се вештачат трагите и ќе се прибираат доказите од двете локации на кои беа најдени безживотните тела.