Копнениот упад на Израел во Газа ќе има „катастрофални последици“ за стабилноста на регионот, предупреди катарското Министерство за надворешни работи. Операцијата ќе биде дел од политиката на „колективно казнување и обид за принудно раселување на палестинскиот народ“, соопшти Министерството.
Катар ги обвини Израелците за кршење на меѓународното и хуманитарното право со принудувањето на цивилите да бегаат во соседните земји. „Државата Катар изразува длабока загриженост поради израелскиот копнеен упад во Појасот Газа и го смета за опасен развој што ќе има катастрофални безбедносни и хуманитарни ефекти во Појасот, особено врз безбедноста на цивилите и заложниците“, се вели во соопштението.
„Тоа, исто така, предупредува на катастрофални последици за безбедноста и стабилноста на регионот“, се додава. Министерството за надворешни работи нагласи дека упадот претставува „флагрантно кршење“ на резолуцијата усвоена од Генералното собрание на ОН со која се повикува на итен хуманитарен прекин на огнот.