Европската комисија доцна синоќа го поздрави потпишаниот Меморандум за стратешката цел – членство во Европската унија на Република Македонија, кој го потпишаа сите партии, освен ДПА и Либералната партија, што се претставени во македонскиот Парламент.
Како што јавува дописникот на МИА од Брисел, во неформалната Влада на Унијата се уште го проучуваат текстот на Меморандумот, но не кријат дека е одличен потег на патот на Македонија кон полноправно членство во ЕУ.
– Ние сме свесни за потпишувањето на Меморандумот и во моментов го проучуваме текстот. Во принцип, Комисијата ги охрабрува и поздравува меѓупартиските договори за ЕУ-агендата, како и превземените чекори што водат кон инклузивна соработка на сите засегнати страни со цел да се исполни стратешката цел на европската интеграција. Овој Меморандум, исто така, го поздравуваме и како дел од спроведувањето на договорот од 1 март, вели портпаролот на Комисијата, Петер Стано, во изјава за МИА.
Овој потег на македонските политички партии доаѓа во време на финализација на прогрес-извештајот на ЕК, кој е најавено дека ќе биде објавен на 16-ти октомври. Извештајот, се очекува да содржи нова, петта по ред препорака за членство на Република Македонија во Унијата.
Синоќа, потпишувањето на Меморандумот за ЕУ во Македонија го поздрави и известувачот за земјата во Европскиот парламент, Ричард Ховит, нарекувајќи го “позитивен сигнал дека домашната политичка дебата може да биде тргната настрана од прашањата што би можеле да предизвикаат нови блокади во процесот на зачленување во Унијата”.
