Израелските воздухопловни сили продолжија со нападите во текот на ноќта и утрово врз Појасот Газа по оние што ги изврши исламистичката група Хамас во текот на викендот. Десетици воени авиони нападнаа повеќе од 200 цели во областа Ал Фуркан, соопштија рано утринава израелските одбранбени сили (ИДФ).
Тоа беше трет пат во последните 24 часа да се извршат големи напади во Појасот Газа, а вкупно беа погодени повеќе од 450 цели. Израелската војска соопшти дека Хамас го користи Ал Фуркан, во северниот дел на Појасот Газа, како терористички центар.
Израел смета дека таа област е база за бројни терористички напади кои се извршени против Израел. Војската, исто така, објави дека борбените авиони во текот на ноќта ги уништиле „напредните системи за откривање“ на Хамас што се користат за забележување воени авиони.
Israeli forces appear to be currently shelling the port of Gaza pic.twitter.com/u4XSv8vrQn
— OSINTtechnical (@Osinttechnical) October 10, 2023
Во бомбардирањето беа погодени и магацинот за оружје и командниот центар Исламски џихад, додаде армијата.
Бројот на луѓе убиени во Израел во нападите на Хамас што почнаа во саботата сега се искачи на најмалку 1.200, изјави портпаролот на израелската војска Џонатан Конрикус во ажурирањето на ситуацијата рано утринава. „Огромното мнозинство“ од убиените се цивили, рече Конрикус, опишувајќи ја бројката како „неверојатна“ и „незамислива“.
Повредени се повеќе од 2.700 луѓе. „За жал, нешто ми кажува дека овие бројки не се конечни“, додаде портпаролот. Според Министерството за здравство на Газа, најмалку 900 луѓе загинале во Појасот Газа како резултат на контранападите на израелските воздухопловни сили до вторник навечер, а 4.500 беа ранети.
Претставник на Хамас во средата изјави дека најмалку 30 луѓе биле убиени во израелските напади во текот на ноќта, а неколку стотици биле ранети. ОН објавија дека повеќе од 260.000 луѓе во Газа се внатрешно раселени.