Американскиот претседател Џо Бајден и шпанскиот премиер Педро Санчез ја истакнаа својата поддршка за Украина во војната со Русија во петокот, за време на состанокот во Белата куќа, на кој се осврнаа и на миграцијата и одбранбената соработка. За време на состанокот во Овалната соба, Бајден рече дека „заедно ја поддржуваме Украина“, а Санчез директно го обвини рускиот претседател Владимир Путин за војната.
„Ја поддржуваме Украина. Се разбира, работиме за траен и праведен мир кој целосно го почитува меѓународното право и принципите на Повелбата на ОН“, рече Санчез. „Не се залажувајте, во оваа војна има агресор и жртва, а агресор е претседателот Путин“.
Санчез ја изрази својата „безусловна поддршка“ за украинскиот претседател Володимир Зеленски и го поддржува неговиот мировен предлог, кој вклучува барања за враќање на територијата на Украина во статус кво пред руската анексија на Крим во 2014 година.
Но, додека Мадрид се согласува со Вашингтон за незаконитоста на руската инвазија во февруари 2022 година, се очекуваше Санчез да ги пренесе различните ставови на Кина и Бразил и да предложи да се слушнат ставовите на земјите кои не се членки на НАТО, изјави претходно шпански дипломатски извор.
Соединетите Држави реагираа скептично на кинескиот мировен план од 12 точки, велејќи дека ако Пекинг е сериозен во однос на првата точка за почитување на суверенитетот, треба да ја повика Русија да отстапи. Исто така, бразилскиот претседател Луис Инасио Лула да Силва привлече критики од САД за сугерирањето дека Западот ја „охрабрил“ војната со вооружување на Украина.
Вашингтон и Мадрид потпишаа договор за одбранбена соработка
Официјален претставник на Белата куќа рече дека Кина и Бразил можат да играат улога во евентуалните мировни преговори, но нагласи дека крајот на војната мора да ги почитува принципите на суверенитет и територијален интегритет. „Го поддржуваме повикот на Зеленски за праведен крај на руската војна што почитува одредени принципи, вклучително и суверенитет и територијален интегритет“, рече функционерот пред средбата Бајден-Санчез.
На почетокот на средбата Бајден посочи дека Вашингтон и Мадрид потпишале договор за одбранбена соработка и дека двете земји се занимаваат со миграциските прашања.
„И двајцата се соочуваме со предизвиците на миграцијата на западната хемисфера. Вие вршите проклето добра работа“, рече Бајден.