Училиштата во Велес инсталираа фотоволтаични панели со цел од сопствено производство да ги задоволат своите потреби и да ја намалат сметката за струја откако се на слободниот пазар, но проектантите или изведувачите се погрижиле да го намалат и производството на енергија од сонцето.
Грешка во монтажа на фотоволтаичните панели врз училишта нема само кај Гимназијата „Кочо Рацин“ од Велес која инсталираше фотоволтаични панели и на северна страна.
Дел од инсталацијата нема да работи со полн капацитет поради грешка во монтирањето и кај средното економско училипште „Јовче Тесличков“ во Велес.
Пратеникот на СДСМ од Велес и поранешен кандидат за градоначалник, д-р Ненад Коциќ на својот Фејсбук профил објави фотографија од панелите и праша зошто половина од панелите се монтирани на јужната страна од спортската сала во склоп на училиштето чија зграда, но и високите дрвја ги покриваат панелите.
„Каде е север, каде е југ? Прашајте го Шпицниот кандидат, оти овој нема појма…Зошто фотоволтаиците на југ се поставени во сенка?“, прашува тој на денот кога лидерот на ВМРО-ДПМНЕ, Христијан Мицкоски беше во Велес и заедно со градоначалникот Марко Колев вршеа увид на проектите на општината.
„Да се ладат, да не се запалат провизиите“ е еден од коментарите на објавата.
Пратеникот на СДСМ обвини претходно дека со средства од Владата и МОН општините местат фотонапонски панели за сопствено производство на струја во училиштата, а некој паметен половина од нив ги поставува на северна страна.
Подоцна објасни дека според новите информации, основниот проект бил изработен од консултант на гимназијата „Кочо Рацин“ и проектот воопшто не бил таков, но некој ја згрешил монтажата.