Амбасадорот на САД во Србија, Кристофер Хил, истакна дека сега најитно е да се реши прашањето за Заедницата на српските општини.
Хил, за Бета, оцени дека Белград и Приштина на средбата во Брисел покажале дека се „многу сериозни за одење напред“.
„Мислам дека најитно е да се реши прашањето за ЗСО и има неколку причини за тоа, една од нив е дека прашањето постои веќе 10 години, и второ, мислам дека ако почнеме со тоа, луѓето ( Србите во Косово) ќе се вратат во институциите.
„Она што се обидуваме да го направиме е да ја смириме целата ситуација, бидејќи тоа е неопходно“, рече американскиот амбасадор.
Тој посочи дека треба уште многу да се работи, но дека најважен дел од работата е спроведувањето на договорот. Хил рече и дека сите разбираат колку е важно прашањето за преговорите меѓу Белград и Приштина.
„И со важноста доаѓа итноста, тие мора да го решат“, рече тој. Според него, Европската унија вложила многу напор за постигнување договор кој е од „историска важност“.
„Тоа е една од најважните работи што се случуваат во Европа во моментов, мислам дека не сакаме да одиме бавно, туку што е можно побрзо“, рече Хил.
Тој изјави дека дијалогот меѓу Белград и Приштина е едно од прашањата кои влијаат на понатамошното инвестирање на американските компании во Србија бидејќи им се најважни мирот и стабилноста.
„Она за што американските компании се најзаинтересирани кога инвестираат каде било е прашањето за мирот и стабилноста. Затоа мислам дека компаниите ќе ги следат прашањата како дијалогот меѓу Приштина и Белград, бидејќи таквите прашања можат многу да помогнат за привлекување повеќе инвестиции“, рече Хил. .
Мирот и стабилноста, додаде тој, ја прават Србија „толку вредна дестинација за инвестиции“.
Тој нагласи дека американските компании, кои главно работат во Србија во технолошкиот сектор, се задоволни од климата, но и од младите кои работат за нив.