Украина објави дека уапсила човек кој се инфилтрирал во украинските сили и обучувал украински војници, но всушност, тврдат тие, е руски шпион.
Украинската безбедносна служба соопшти дека мажот бил уапсен во Миколаев, јужна Украина, откако било откриено дека собирал разузнавачки информации за Русија.
Се вели дека шпионот имал задача да пренесе информации за распоредувањето на украинските одбранбени сили и локациите на базите со оружје и муниција што Русија би ги таргетирала во ракетните напади.
Контраразузнавачите го разоткриле рускиот агент пред тој да пренесе каква било информација, тврди украинската служба за безбедност.
„Предавникот самоиницијативно се појавил во ФСБ (Руската служба за безбедност) и ја понудил својата помош во војната против Украина“, објави Службата за безбедност на Украина на Телеграм.
При претресот на куќата на мажот бил пронајден мобилен телефон со преписка со Русија, како и оружје и муниција, кои биле испратени на вештачење, соопшти украинската служба за безбедност.
„Во тек е предистражна постапка за да се идентификуваат сите лица вклучени во непријателски разузнавачки и субверзивни активности“, додаде украинската безбедносна служба.