Сопственикот на Renaissance Residence, станбен комплекс уништен од земјотресот во провинцијата Хатај во југоисточна Турција, бил приведен на аеродромот во Истанбул во петокот додека се обидувал да ја напушти земјата.
Мехмет Јасар Чошкун бил запрен на аеродромот Сабиха Ѓокчен во обид да отпатува за Црна Гора, јави турската агенција Анадолија.
Апсењето е извршено по наредба на главниот јавен обвинител во областа Газиосманпаша во Истанбул.
Чоскун патувал за Црна Гора со помала сума пари, која била запленета од аеродромската полиција, се наведува во извештајот. Тој допрва треба официјално да биде обвинет.
12-катниот комплекс се состоеше од 250 апартмани, а се наоѓаше во областа Антакија во Хатај. Беше рекламиран како проект за луксузна резиденција што ги почитува градежните прописи.
Комплексот целосно беше уништен по земјотресот со јачина од 7,8 степени според Рихтеровата скала што во понеделникот наутро го погоди југоисточниот град Газиантеп, а набргу потоа и земјотрес со јачина од 7,5 степени во провинцијата Кахраманмарас.
Во четвртокот, турскиот министер за правда објави дека е покрената судска истрага за урнатите згради за време на земјотресот.
Истрагата ќе се обиде да ги повика на одговорност оние кои ги изградиле зградите или сноселе каква било одговорност за нивното уривање во 10-те најпогодени провинции.