Украинските и иранските власти неодамна се сретнаа за да разговараат за наводите дека Русија користи ирански беспилотни летала за да ја нападне Украина, јавува Си-Ен-Ен.
Да потсетиме дека во последниве недели Украина и нејзините западни сојузници го обвинија Иран дека ја снабдува Русија со т.н. беспилотни летала камикази за напади врз украинската енергетска инфраструктура и станбени згради.
Овој месец, по неколкунеделни негирања, Техеран призна дека испратил беспилотни летала во Русија, но рече дека тие биле испратени пред почетокот на војната во Украина.
Говорејќи за неодамна одржаната средба со Иранците, портпаролот на украинското МНР Олег Николенко потврди за Си-Ен-Ен дека „одржана е средба на ниво на експерти“.
„Не можам да ги откријам деталите, но ве уверувам дека украинската страна продолжува да презема најдрастични мерки за да ја спречи руската употреба на иранско оружје во војната против Украина“, рече Николенко, додавајќи дека „Украина го предупреди Иран за последиците за соучесништво во војната“.