Заменик претседателот на Владата задолжен за европски прашања, Бојан Маричиќ денес имаше средба со постојаниот координатор и претставник на УНДП во Северна Македонија, Армен Григориан.
– Обединетите нации (ОН) и агенциите на ОН се наш децениски партнер во постигнувањето инклузивен и одржлив развој и постигнувањето реформски цели кои произлегуваат од националните приоритети, за што би сакал да изразам искрена благодарност, рече вицепремиерот Маричиќ на почетокот на средбата.
Маричиќ и Григориан разговараа за текот на пристапниот процес, како и за европските реформи кои Владата ги спроведува и во тој контекст потенцираа дека соработката со ОН е одличен пример за инклузивна донаторска поддршка која ги зема предвид сите релевантни чинители како националната и локалната власт, граѓанските организации, донаторите, приватниот сектор, медиумите и тоа во процесот на планирање, како и во процесот на спроведување на поддршката.
На средбата, Григориан посочи дека приоритетите на ОН за Северна Македонија согласно Рамката за развојна помош на ОН 2021 – 2025 година се одржливиот и инклузивен економски и социјален развој, климатските активности, природните ресурси и управувањето со ризик од катастрофи, транспарентното и одговорно демократско владеење, кои се целосно во согласност со националните приоритети за развој и полноправно членство во ЕУ.
Со вицепремиерот Маричиќ разменија мислења и околу потребите од поддршка од страна на УНДП за реализација на реформски проекти и други можности за интензивирање на соработката.
УНДП има спроведено над 200 проекти од осамостојувањето на земјата досега, кои вредат над 66 милиони евра, и тоа финансирани или кофинансирани заедно со други донатори, со што имаат дадено значаен придонес во развојот на Северна Македонија.