Пет лица загинаа во Нов Зеланд кога се превртел поголем брод во кој се наоѓале загинатите, а се верува дека можната причина за несреќата е судар со кит, соопштија властите.
Полицијата соопшти дека чамецот долг 8,5 метри се превртел во близина на градот Каикура на Јужниот остров, а биле спасени уште шест лица кои се наоѓале на него.
Градоначалникот на Каикура, Крег Мекл, изјави за АП дека водата била мирна во моментот на несреќата и дека се верува дека китот излегол од под чамецот.
Тој изјави и дека и претходно се размислувало за можни судири меѓу чамци и китови, со оглед на нивниот голем број во регионот, но дека такви несреќи досега не биле евидентирани.
Каикура е популарна дестинација за гледање китови, а бројни компании нудат патувања со брод или возења со хеликоптери за да можат туристите одблиску да видат китови, делфини и други морски животни, пренесува американската агенција.