Десетици илјади лица денеска се евакуирани од југозападна Кина во побезбедни области, бидејќи се проценува дека областа, што е погодена од топлотен бран и суша во поголемиот дел од летото, сега е во опасност од поплави поради обилните дождови.
Кинеската метеоролошка служба прогнозираше дека силните врнежи од дожд во делови од провинциите Сечуан и Чонгкинг ќе се задржат најмалку до вторник, пренесуваат американските медиуми.
Во Чонгкинг, мегаград изграден во ридско подрачје, за денеска и за утре е издадено предупредување за опасност од поплави.
Властите од вчеравечер на побезбедни места веќе евакуираа 61.000 лица од Сечуан, бидејќи во текот на ноќта врнеше силен дожд, јави денеска државната телевизија ЦТВ.
Извор: МИА