Автор: Петар Клинчарски
По изрекувањето на пресудата за „Талир 2“, застапникот на обвинението, обвинителот Љубомир Лапе, истакна дека по добивањето на писмената пресуда, ќе се разгледаат причините поради која е изречена условна наместо затворска казна на второобвинетиот Кирил Божиновски и најверојатно ќе поднесат жалба.
Во однос на конфискацијата, обвинителот Лапе кажа дека се однесува на 30 штабови низ Македонија, вклучувајќи го и главниот во скопски Центар, но и останатите во државата.
„Го повлековме предлогот за конфискација на земјиштето од причина што тоа не е опфатено со стореното кривично дело“, изјави Лапе.
На новинарски прашања што ќе влезе во конфискацијата од внатрешноста на „Белата палата“, Лапе одговори „ работи што се вградени во објектот спаѓаат во конфискацијата“, но, не и мебелот и уметничките слики.
Во пресудата, поранешниот претседател на ВМРО-ДПМНЕ, Никола Груевски доби затворска казна од 6 години затвор, додека поранешниот генерален секретар на партијата Кирил Божиновски, доби условна затворска казна од две години за изградбата на партиското седиште на партијата.