Генералниот секретар на Влада, Мухамед Зекири даде оставка од функцијата. Откако утринава се обзнани дека против него има истрага за злоупотреба на функцијата, преку социјалните мрежи му се обрати на премиерот Димитар Ковачевски.
„Низ мојот работен век секогаш сум го одбирал вистинскиот пат, патот на чесноста, праведноста и вистината. На овие мои животни вредности сакам да останам доследен. Затоа, како човек со личен интегритет, ја поднесувам мојата неотповиклива оставка од функцијата Генерален секретар на Владата на Република Северна Македонија. Верувам во институциите на системот, верувам во правичноста и праведноста и верувам дека вистината ќе излезе на виделина. На сите институции им стојам на располагање во секое време, за да ја докажам мојата невиност.
Почитуван претседателе, Ви благодарам на укажаната можност да бидам дел од Вашиот владин состав и Ви благодарам што верувате во мојата заложба и посветеност во работата“, напиша Зекири.
Генералниот секретар на Владата, Мухамед Зеќири, утрово не знаеше дека против него се води истрага за злоупотреба на службената положба и овластување. Тој во кратка изјава за „А1он“ рече: „Нема такво нешто“. На прашањето дали знае дека за него е побаран и притвор, тој рече: „Не, не“.
За него е побаран и притвор, поради омжност да влијае на сведоци, да избега и да го повтори делото. Претходно, јавен обвинител донесе наредба за истрага во која осомничени се Мухамед Зеќири и две други лица. Зеќири се гони бидејќи во периодот од месец април 2021 година до месец јануари 2022 година, со искористување на својата службена положба без спроведување на соодветна постапка за јавна набавка, склучил договор за консултантски услуги со правно лице во што со умисла му помогнале осомничените хрватски државјани.
„Со преземените дејствија осомничените за правното лице прибавиле значителна противправна имотна корист во вкупна вредност од 57.932.100,00 денари, а на штета на Буџетот на Р.Северна Македонија. Износ што бил поголем од 795.000 евра, односно од договорениот износ за вршење на консултантските услуги“, пишува во соопштението на ОЈО за гонење организиран криминал и корупција.