ВМРО-ДПМНЕ повикува на дијалог и решавање на разноликоста во позициите на СДСМ внатре во самата партија. Во реакцијата на изјавата на портпаролот на СДСМ Петре Шилегов истовремено изразува зачуденост како СДСМ си дозволува да го ускрати и правото на некого да побара дијалог.
– Не знаеме кој ја пишувал содржината на денешната изјава на портпаролот на СДСМ, Петре Шилегов, но очигледно е дека тој што е автор нема никаков интерес од конструктивна политичка дебата во Република Македонија. Не сакаме да влегуваме во процес на меѓусебни обвинувања и квалификации. Повикуваме на дијалог, се наведува во партиската реакција.
ВМРО-ДПМНЕ, се наведува натаму, побара да се седне на маса да се дискутира и да има дијалог.
– Ова одбивање на дебата и дијалог за жал не се разликува од одбивањето за дијалог, кое што кон Македонија го прави еден од нејзините соседи, пишува во соопштението.