Владејачката партија ВМРО-ДПМНЕ реагира на денешната прес-конференција на потпретседателот на СДСМ, Дамјан Манчевски, кој побара од МВР да дадат одговор за новодојдените фантомски гласачи во Скопје.
„Дамјан Манчевски во очигледна безидејност одржа прес-конференција на која лично тој по којзнае кој пат си го погази својот збор. Токму тој, како преставник на СДСМ во Државната изборна комисија беше вклучен во прочистувањето и прегледувањето на Избирачкиот список и самиот на јавноста и потврди дека списокот е прочистен и дека со него може да се оди на избори. Манчевски на седницата на ДИК истакна дека прочистувањето на избирачкиот список се одвиваше согласно барањата на СДСМ и дека немаат дополнителни забелешки и избирачкиот список е подготвен за локалните избори“, реагираат од ВМРО-ДПМНЕ.