Претседателот на Демократската унија за интеграција Али Ахмети денеска се сретна со американскиот амбасадор Пол Волерс со кого разговараше за политичките случувања во државата, неговите посети на Берлин, Тирана и Софија, како и за потребата од постигнување на компромисно решение за името.
Ахмети, како што соопшти ДУИ, го информирал американскиот амбасадор за средбите што ги имал во Берлин, Тирана и Софија, како и за напорите на партијата за поттикнување за решавање на спорот со името.
Лидерот на ДУИ побарал поголема и директна ангажираност од Вашингтон за да се олесни постигнувањето на компромис со јужниот сосед и најавил дека ќе продолжи со промотивната кампања за придобивките на земјата од зачленувањето во НАТО.
– ДУИ е посветена Македонија да стане полноправна членка на НАТО и ЕУ и прави напори да поттикне конструктивна дебата во целото општество за придобивките што земјата и регионот ги имаат од евроатлантскиот интегративен процес. Овие напори треба да наидат на храбра поддршка од сите општествени сегменти затоа што зачленувањето во НАТО и започнувањето на преговори за членство во ЕУ носи одржлив мир, сигурност и стабилност, како и економски развој, наведуваат од партијата.
Амбасадорот Волерс ја повторил поддршката на САД за зачленувањето на Македонија во евроатлантските структури.