„Да не прејудицираме како ќе одлучи советот, тука во Карпош има разумни советници кои си одлучуваат со своја глава“, вели градоначалникот Стефан Богоев за деталниот урбанискички план според кој треба да се изградат 50 објекти зад Институтот за белодробни заболувања кај децата „Козле“.
Граѓани и невладини организации бурно реагираат на овој ДУП. Според нив не е во ред да се урбанизира просторот зад клиниката во која со децении се лекуваат деца со белодробни заболувања.
Невена Георгиевска од „О2 иницијатива“ вели дека ДУП-от е донесен во времето на Стевчо Јакимовски, пред шест години. Таа смета дека повторно треба да има јавна анкета за ДУП-от, и стратегиска оцена за влијание на животната средина бидејќи се работи за место кое е дел од парк шумата Водно.