Еден израелски војник и еден цивил денеска се ранети во напад со нож во близина на централната полициска станица во Ерусалим, а напаѓачот, за кого беше јавено дека е млад Арап, е убиен од полицијата, пренесуваат медиумите.
Полицијата официјално не соопшти дека тој бил убиен, но снимки објавени на социјалните мрежи покажуваат како полицајци го пренесуваат неговото тело.
„Околу 1 часот и 30 минути, напаѓачот дошол со градската железница, го извадил ножот и со него повредил двајца луѓе на местото. Полицајци кои се нашле во близина реагирале веднаш, застрелувајќи го напаѓачот и неутрализирајќи го,“ велат од полицијата, без да појаснат дали ова значи дека тој е убиен или ранет.
Израелското министерство за одбрана го оквалификува нападот како терористички.
Медицинските служби соопштија дека и жртвите, а и напаѓачот, биле млади луѓе на возраст од околу 20 години. Ранетите се пренесени во блиската болница Хадаса, во која им е укажана помош.
Непријателствата меѓу Израелците и Палестинците повторно ескалираа во изминатите две недели и се претворија во вистинска војна – Израел жестоко ја бомбардираше Газа, убивајќи неколку стотици луѓе, од кои над 60 се деца, додека милитантната организација Хамас ги ракетираше градовите ширум Израел, каде официјално има 12 загинати.