Повеќечасовните преговори меѓу премиерите на Србија и Косово, Ивица Дачиќ и Хашим Тачи со посредство на високиот претставник на ЕУ за надворешна политика и безбедност Кетрин Ештон, завршија синоќа во Брисел без конечен договор околу планот за имплементација на Спогодбата за нормализација на односите меѓу Белград и Приштина.
По средбата Тачи пред новинарите кусо изјави дека двете страни „ги приближиле ставовите, но не се договориле“.
Тој најави дека следниве денови ќе продолжат разговорите по работни групи, а дека неговата следна средба со Дачиќ е закажана за 8 јули во Брисел.
По средбата ниту еден член на српската делегација не им се обрати на новинарите. Според белградскиот весник „Вечерње новости“, српскиот вице-премиер и министер за одбрана Александар Вучиќ, кој исто така присуствуваше на средбата, инсистирал Србија да добие датум за почеток на преговорите за членство во ЕУ во текот на октомври.