Кипарскиот претседател Никос Анастасијадис остро ги искритикува условите на европскиот спасувачки план, што во март и беше наметнат на неговата земја, пренесоа француските медиуми.
Во писмо, испратено минатата недела до шефовите на еврозоната, Анастасијадис ги излага своите видувања и ги кара дека неправедно постапиле кон островската држава.
Кипарскиот конзервативен претседател посочува дека намалувањето на банкарските депозити, што е мерка без преседан во еврозоната, била наметната врз најголемите сметки во двете главни банки на островот без внимателна подготовка.
– Не беше направено никакво разграничување меѓу долгорочните депозити, кои создаваат високи приходи, и парите што се движат по тековните сметки, како обртен капитал на компаниите, дополнува Анастасијадис.
„Тоа доведе до значителна загуба на обртниот капитал на компаниите“, подвлече кипарскиот претседател.
Тој посочи дека ограничувањата врз паричните текови, што беа наметнати во март за да се избегне истекувањето пари и се уште се во сила, и покрај значителните олеснувања, „сериозно го отежнуваат доброто функционирање на претпријатијата“.