Премиерот Зоран Заев вечерва на својата страница на Фејсбук соопшти дека договорил средба со лидерот на ВМРО-ДПМНЕ Христијан Мицкоски, на која ќе разговараат за важни актуелни прашања.
Лидерот на најголемата опозициска партијаМицкоски претходно го повика премиерот Зоран Заев на тет-а-тет средба во Клубот на пратеници, за да разговараат за кризата со пандемијата, работата на Парламентот, за пописот, економијата, евроинтеграциите, изборите…
„Договорена е средба со претседателот на ВМРО-ДПМНЕ Христијан Мицкоски, во понеделник во 13 часот во Клубот на пратеници. Ќе разговарам со Мицкоски за најважните прашања од интерес на граѓаните со цел државата да ни оди напред,“ напиша Заев.
До иницијативата за средба доаѓа откако мнозинството и опозицијата во Собранието денеска постигнаа договор да се одблокира работата на законодавниот дом и да се донесат законите за државната антикризна помош за стопанството.
Законите, сепак, најверојатно ќе останат блокирани, откако вечерва Алијанса за Албанците и Алтернатива поднесоа над 3.000 амандмани, условувајќи го ослободувањето на процесот со поддршка за измените во Законот за државјанство кои ги предложија, но им беа одбиени.