Со огномет организиран во негова чест, светскиот рекет број еден Новак Ѓоковиќ денеска беше пречекан во Белград, на денот на кој го собори еден од најтешко достижните тениски рекорди, почнувајќи ја 311-тата недела на врвот на АТП листата, што е најмногу досега во историјата на овој спорт.
Стотици фанови уште од попладнето се собраа пред неговиот ресторан „Новак“, а Ѓоковиќ при пристигнувањето ги поздрави и им се заблагодари за честитките.
„Денес е посебен ден за мене, за моето семејство и за Србија. Ви благодарам за успехот, тој не е само мој, туку и ваш и на целата нација. Јас тоа најмногу го сфатив пред десет години. И пред тоа. Но, некако најмногу ме допре она од Белград од 2011 година, по Вимблдон, кога првпат станав број 1. Србија тогаш приреди нешто на што вечно ќе ви бидам благодарен. Затоа чувствувам огромна чест и задоволство што ве претставувам. Знам дека ви ги кинам живците, но се надевам дека уживате во тоа,“ им рече Ноле на насобраните фанови, кои подготвија и мала музичка програма во чест на нивниот идол.
Според најавите, Ѓоковиќ вечерва, по кусата забава и средбата со фановите, ја продолжил прославата во својот ресторан, заедно со членовите на семејството и блиските пријатели.