Новоизбраната потпретседателка на САД, Камала Харис, и нејзиниот сопруг Даг Емхоф, денеска ја примија првата доза од вакцината против Ковид-19, јави ДПА.
-Сакам да ги охрабрам сите да ја примат вакцината, рече 56-годишната Харис по добивањето на инјекцијата. “Буквално, ова е спасување животи. Јас верувам во науката и научниците се тие што ја создадоа и одобрија оваа вакцина”.
Вакцината, создадена од компанијата „Модерна“, и беше дадена во Медицински центар во Вашингтон, а за да биде максимално ефикасна треба да се примат две дози, пренесе германската агенција.
Други врвни јавни службеници, вклучувајќи го и новоизбраниот претседател Џо Бајден и сегашниот потпретседател Мајк Пенс, претходно добија дози на вакцината „Фајзер“ / „БиоНТек“, првата вакцина што беше пуштена во САД.
Претседателот во заминување Доналд Трамп, кому му беше дијагностициран Ковид-19 во октомври, допрва треба да прими вакцина против коронавирусот, пренесе ДПА.