Министерот за надворешни работи на Република Северна Македонија, Бујар Османи денес имаше средба со Георг Вуцас, вонреден и ополномоштен амбасадор на Република Австрија во Република Северна Македонија, по последните трагични случувања и грозоморни убиства во Виена. На средбата Османи ја пренесе поддршката на Република Северна Македонија на Австрија во справувањето со вчерашниот акт на тероризам, изразувајќи притоа сочувство за семејствата на жртвите и настраданите, пренесувајќи ги и желбите за што побрзо заздравување на повредените.
Османи посочи дека веќе во неколку наврати, и на повеќе нивоа, највисоките претставници на земјава изразија сериозна и бескомпромисна осуда на овој терористички чин. Исто така, Османи во оваа прилика пренесе дека за радикалниот ислам и сите форми на екстремизам нема толеранција и оправдување.
„Силно го осудуваме синоќешниот терористички напад во Виена и ја споделуваме болката со нашите австриски и европски пријатели. Тероризмот не признава ниту нација, ниту потекло, и цврсто стоиме против сите негови форми, без разлика од кого е сторен. Сега е најважно да се покаже солидарност и координација во заедничкиот одговор против ваквото зло, кое штети на толеранцијата и се заканува да создаде раздор помеѓу Европа и други делови од светот. Одговорот треба да биде едногласен и одлучен, солидарноста на Европа е клучна во овие моменти на заштитата на нашите демократии. “ – истакна Османи, посочувајќи притоа дека Република Северна Македонија и како членка на НАТО, и како земја – кандидат за членство во Европската Унија, активно придонесува кон меѓународната коалиција за борба против тероризмот од било каков вид.
На средбата Османи изрази целосна подготвеност на нашите безбедносни структури за активна соработка со безбедносните органи на Австрија и Европол.
„Со оглед на појавените информации за можните двојни државјанства на некои од учесниците, добив потврда од нашите безбедносни структури дека се во целост ставени на располагање за потребите на органите на прогон на Австрија, како и на Европол. Северна Македонија ќе се залага безрезервно во справувањето и сузбивањето на ваквите и било какви други видови на тероризам и насилство врз невини луѓе, кои ја загрозуваат стабилноста и демократијата на Европа, и ги нарушуваат основните нејзини вредности и принципи. “, истакна Османи, упатувајќи уверување за целосна соработка и отворена поддршка од земјава при расчистување на целиот случај и изведување на напаѓачите пред судот на правдата.
