Со неселективно пукање, терорист утрово уби најмалку едно лице и рани четворица, меѓу кои и дванаесетгодишно девојче, во западниот париски предградие Трап.
Напаѓачот (39) е уапсен, а истрагата ја презеде Националното обвинителство за борба против тероризмот.
Крвавиот поход започна нешто по 10:30 часот во Трап, во департманот Ивелин, и продолжи во соседната општина Ла Вериер.
Напаѓачот, возејќи по националниот пат Н10, пукаше неселективно кон минувачите од автомобилот. Тој испука куршуми кон детско игралиште, здравствена установа, бензинска пумпа, како и кон улица со бројни продавници.
Полицијата набргу го совлада на паркингот пред продавница за градежна опрема и го приведе.
Меѓу повредените е и 12-годишно девојче, кое, според градоначалникот на Ла Вериер, Никола Данвил, беше погодено со дури осум куршуми. Нејзината состојба е стабилизирана.
Ранети се и двајца мажи, на возраст од 49 и 29 години. Нивните животи не се во опасност.
Националното обвинителство за борба против тероризмот отвори истрага за убиство и обид за убиство поврзани со тероризам, поседување оружје и терористичко здружување заради подготовка на напади врз луѓе.
Мотивот за овој крвав чин сè уште не е познат.
Градоначалникот на Трап изјави дека напаѓачот очигледно сакал да изврши масакр.
Премиерот Себастиен Лекорни го осуди ова тешко кривично дело и наведе дека се мобилизирани сите полициски и правосудни сили.
Министерот за внатрешни работи, Лоран Нуњез, потврди дека е започната антитерористичка истрага.