Две недели стагнира бројот на заболени во Министерството за внатрешни работи, каде се евидентирани 100 активни случаи, заболени од коронавирус. Според статистиката, нема промена ниту во бројот на вработени кои добиле решение за самоизолација. И натаму, 183 вработени, поради контакт со лице заболено со коронавирус се во домашна изолација.
Најголем број од заболените активни случаи се полициски службеници од СВР Скопје каде има 27 заболени, што е за тројца вработени помалку, споредено со пред две недели. Исти број заболени има во Одделот за граѓански работи каде заболени се 12 лица, Одделот за гранични работи и миграција- РЦ Југ каде евидентирани се 10 активни случаи, Одделот за обезбедување на лица и објекти со пет заболени.
Еден заболен помалку сега има во Одделот за специјални полициски операции, каде останува само еден активен случај на коронавирус. Во Единицата за брзо распоредување и натаму нема активни случаи, а во Одделот за сузбивање на организиран и сериозен криминал, како и Одделот за општи и заеднички работи има по четири лица позитивни на коронавирусот.
Од МВР велат дека во останатите организациони единици на ниво на МВР бележиат опаѓање на бројката на активни позитивни случаи.
