За две недели, нов, мал пораст на бројот на заболени од коронавирус, вработени во Министерството за внатрешни работи. Од службите, евидентирани се 100 активни случаи инфицирани со вирусот, што е за осум лица повеќе споредено со претходно кога имаше 92 заболени. Истовремено, во континуитет се намалува бројот на вработени кои се во самоизолација поради контакт со лице веќе заразено со вирусот.
Најголем број од заболените се полициски службеници од СВР Скопје – 30, Одделот за граѓански работи – 12, Одделот за гранични работи и миграција- РЦ Југ – 10, Одделот за обезбедување на лица и објекти – 5, во Одделот за специјални полициски операции-ЕСЗ – 2, во Единицата за брзо распоредување нема активни случаи, во Одделот за сузбивање на организиран и сериозен криминал и Одделот за општи и заеднички работи има по 4 активни случаи.
„Во останатите организациони единици на ниво на МВР бележиме опаѓање на бројката на активни позитивни случаи“, велат од МВР.
Како резултат на направените епидемиолошки анкети од страна на Државниот здравствен и санитарен инспекторат во моментов во самоизолација се наоѓаат 183 вработени во Министерството за внатрешни работи, што е за осум лица помалку за разлика од пред две недели, кога имаше 191 изолиран вработен.
