Претседателот Стево Пендаровски ќе го додели мандатот за Влада, бидејќи мандатите на пратениците веќе се верифицирани и Собранието се смета за конституирано.
Реакцијата од Пендаровски доаѓа откако Талат Џафери изјави дека Собранието сè уште не e конституирано, бидејќи не е избран нов спикер.
„Во врска со изјавите изнесени од претседавачот Талат Џафери во интервју на ТВ 21, информираме дека претседателот се консултираше со еминентни правни имиња и заклучокот беше јасен: за да се смета дека Собранието е конституирано, потребна е верификација на мандатите на пратениците, а не нечиј избор“, велат од кабинетот на Пендаровски.
Претседателот Пендаровски вели дека иако ги разбира мотивите на претседавачот Џафери, останува на неговиот став, кој според него го потврдува и политичката практика во сите изминати години кога на власт биле различни опции.
Пендаровски ова го поткрепува со искуствата во минатото, Стојан Андов во 2006 година и Трајко Вељаноски во 2016 го информирале претседателот на државата дека Собранието е конституирано, како претседавачи со конститутивната седница, а не како спикери.
