Лидерот на СДСМ Зоран Заев порача вечерва од Велес дека граѓаните треба да се гордеат затоа што со членството во НАТО „добиле имотен лист на државата“.
„Бидете горди, со членството во НАТО добивме имотен лист на државата, никој повеќе не ветува НАТО и ЕУ, тоа е завршена работа! Триесетгодишната стратешка цел членство во НАТО е завршена работа, а 15 години сме земја кандидат за членство во ЕУ и чекаме одлука за почеток на преговорите,“ рече Заев на трибина организирана во рамките на предизборната кампања.
„Сето тоа го добивме и е завршена работа. При тоа не сме веќе непријатели со соседите, туку пријатели и денеска ги имаме за сојузници сите наши пет соседи. Тоа е паметно сите земји градат пријателство, а малите земји уште повеќе градат пријателство за да им се најдат и да им помогнат, за животот подобро економски да го живееме со подобар стандард,“ рече Заев пред велешани.
Тој рече дека договорите што ги постигнале со Бугарија и Грција ни билеа „влезна карта“ за во НАТО и ЕУ.
„Срцето ни се топеше од радост кога се креваше знамето на НАТО пред нашиот Парламент и кога нашето знаме се креваше пред седиштето на НАТО,“ рече претседателот на СДСМ и носител на кандидатска листа на пратеници во ИЕ4 на вечерашната трибина во Велес.