Министерот за здравство, Венко Филипче, изразува жалење и не разбира зошто од страна на дополнителната заменик-министерка за финансии се блокираат средствата од Светска банка наменети, меѓу другото, за здравствениот систем да може да одговори на потребите на пациентите со Ковид-19.
– Навистина жалам што дополнителната заменик-министерка не го потпишува заемот. Имавме прашања од нејзина страна на кои одговоривме осум пати. Станува збор за кредит, помош што е од Светска банка за оваа намена за поддршка на здравствените системи. Во светот кредити зеле повеќе од 100 земји и тоа е итен и брз кредит, а ние два месеца одговараме на прашањата на дополнителата заменик минситерка, рече Филипче во одговор на новинарско прашање.
Тој појасни дека средствата се за опремување на инфективните одделенија во целата држава, за интензинва нега низ целата држава, кревети, респиратори, аспиратори, мобилни ренден-апарати и сè што значи квалитетен третман на овие пациентите.
– Не можам да ја сфатам причината зошто се прави тоа и се прави сериозен хендикеп на здравствениот систем во оваа фаза, кога сите земји во светот го прават тоа, и кога не знаеме што нè чека од септември, кога сите земји предвидуваат уште еден посилен бран, рече Филипче и додаде дека кога ја имаме шансата за брз кредит сега имаме ваков проблем.
