Метеж во сообраќајот, долги редици пред банките, маркетите и аптеките, оваа е сликата во Куманово веќе втор ден, по полицискиот час викендов.
Откако во градот беше воведена забрана за движење до 16 часот, граѓаните во претпалдневните часови, масовно излегуваат и пазарат.
На сликите може да се забележи дека најголемиот дел се повозрасни лица кои дури се туркаат еден до друг и не го држат пропишаното растојание, како превентивна мерка за заштита од коронавирусот. Пред некои од експозитурите на банките во ред од утрово се чекало и до два часа.
Пред банките, има и полициски службеници кои ги опоменуваат граѓаните да го запазат редот и растојанието.
Во изминатите два дена, се повторува сликата во градот како онаа пред воведувањето на полицискиот час за викендот, панично се пазари во маркетите и аптеките, а во маалските продавници со пладне снемува леб и млеко.
Трговците во некои од малите продавници, дури одвреме навреме ги заклучуваат вратите во неможност да се справат со масата луѓе кои упорно сакаат да влезат и да пазарат.
