Министерството за здравство информира дека во рамките на процесот за ран скрининг на заболени од коронавирус кој започна во неколку општини, попладнево се направени 30 тестови со поширока индикација и дополнителни 8 кои пристигнаа преку Клиниката за инфективни болести и фебрилни состојби во Скопје.
Од 38 тестирани, позитивни на коронавирус се 7 лица, 3 од Дебар и 4 од Скопје, а попладневно веќе беше соопштено за четворица новозаразени.
Со ова, во текот на денешниот ден, регистрирани се вкупно 11 нови случаи на коронавирус, а бројката на заболени од вирусот во земјата, состојба до 21:00 часот, изнесува 42.
Состојбата на сите пациенти, како што велат од Министерството, е стабилна. Двајца од заболените имаат средно изразена пневмонија.
Во моментов, се работат уште 22 теста и тие се во рамките на скринингот. За резултатите од овие тестови, Министерството за здравство ќе информира во текот на утрешниот ден.