Иако добил порака, експремиерот Зоран Заев во април лани не се сретнал со Бојан Јовановки, првообвинет во случајот „Рекет“. Комуникацијата беше покажана денеска во судот во рамки на доказната постапка во случајот „Рекет“, а Заев за контактирањето со Јовановски зборуваше на прес – конференција во седиштето на СДСМ одговарајќи на новинарско прашање дали се случила средба меѓу нив.
„Човекот пушти порака, но немаше средба. До мене веќе дошле информациите и тоа е индиција за сериозен криминал. Како ретко кој случај во Европа јас го пријавив случајот, како вршител на една од најмоќните функции во државата сум создал простор кај институциите и Обвинителството да работат независно. Некои викаат Господ те штител, не, или си таков или не си таков“, рече Заев.
Од говорницата во СДСМ Заев порача дека Бојан Јовановски, познат на јавноста како Боки 13, треба да одговара.
„Можеш да бидеш газда на провладин медиум, можеш да ме величаш колку сакаш, си се огрешил пред закон – има да одговараш“, рече Заев.
Со пријавата на случајот Заев вели дека дал можност да фунцкионира правната држава, за разлика од Никола Груевски.
„Кога зборувавме за милијарди, слушнавте ли тогаш Никола Груевски да пријави некој случај? Има разлика. Премиер може да забошоти ако сака или да покаже како треба да функционира државата. Прашањето е како постапува државата кога ќе се случат вакви случаи Тоа е разликата дали сме европска земја или припаѓаме на минатото“, рече Заев.