Денешното рочиште за предметот за уривањето на комплексот „Космос“ на бизнисменот Фијат Цаноски, наречено „ТНТ“ заврши до доцна во ноќта, брифираат судски извори за „А1он“. И покрај обидите на одбраната со приговори на почетокот од судењето да го одложи започнувањето на испитувањето на двата последни сведока во постапката, судијата Огнен Ставрев речиси до 20.30 часот вечерва ја држел главната расправа и ја затворил доказната постапка за предметот.
За утре е закажано рочиште со одбрана на обвинетите, што значи дека следуваат завршни зборови и пресуда, која ако продолжи оваа динамика на судење, би била донесена пред Нова година.
Првото рочиште за предметот се одржа на 24 јануари 2018 година, што значи дека предметот се суди безмалку две години.
Утрово адвокатот на обвинетата, Елизабета Најдовска, Мерџан Даути, од судот побара да ги земе предвид неговите три барања, меѓу кои едно од нив се однесува за истекот на мандатот на две од поротничките кои наполниле 60 години, истото барање кое го изнесе и обвинетиот Илија Димовски во предметот „Талир“.
Даути беше пријавен во Адвккатската комора за овој случај дека сака да го блокира судењето со барањата за превод. Тој во судот рече дека за возраста на поротничките кои според Законот за судови, не треба да бидат дел од судечкиот совет поради истек на мандатот, го известил и претсесателот на судот, Иван Џолев и Судскиот совет.
Тој денеска побара вештакот кој го ангажирало СЈО, Павле Гацов, да ги донесе сите документи со кои го изготвил вештачењето, бидејќи, како што рече, тоа било само негово мислење.
Судијата Огнен Ставрев не му ги прифати барањата и рече дека тоа се апсолвирани прашања, а обвинителот Бурим Рустеми, кажа дека обвинетите во секое време имале можност да извршат увид во вештачењето и да назначат технички советник и да нарачат нивно вештачење.
Според обвинението на СЈО, обвинетите во 2011 година сториле кривично дело од политичка омраза со уривање на комплексот „Космос“ на тогашниот политички противник Фијат Цаноски. СЈО тврди дека со постапката на уривање е предизвикана штета од 16 милиони евра, а доплнително на буџетот на општина Гази Баба уште три милиони денари. Цаноски и фирмата ФИМЕТ најавија дека ќе барааат отштета.
Обвинети се експремиерот Никола Груевски, поранешниот министер за транспорт и врски, Миле Јанакиески, ексградоначалникот Тони Трајковски, како и Елизабета Најдовска, Насер Алев, Марика Зафировска и Александра Димитриева. Предметот е во доказна постапка и преостанаа уште двајца сведоци и сослушување на обвинетите.