Фискална сметка на руски јазик и потпишан келнер „Бетмен“ им била дадена на муштерии во познат ресторан во Дебар Маало во Скопје. На фискалната сметка до која дојде „А1он“, а која изнесува 310 денари, се гледа дека муштериите вчера пиеле нес кафе и макијато и јаделе пекарски компир. Тоа е напишано на македонски јазик, а сето останато на руски.
Претпоставките се дека станува збор за непрокнижени пари и неевидентиран промет со цел да се избегне плаќањето данок и дека ваквите сметки се делат редовно во ресторанот, особено кај пониски суми кога често посетителите не ги погледнуваат пред да ги платат.
Ова не е ваков единствен случај. Контролите на Управата за јавни приходи често често покажуваат неправилности. Во 2018 година, од вкупно спроведени 7.148 контроли за фискализација, 826 биле со утврдени неправилности во најголем дел кај обврзници во Скопје, но и во други градови како Прилеп, Битола, Струмица, Штип, Кочани, Куманово…
При контролите за фискализација, најчести утврдени неправилности се неиздавање на фискални сметки, односно користење на компјутерски сметки/маркери како замена за фискална сметка.
Освен овој невообичаен начин со руско – македонски сметки, многу угоститетели употребуваат и други начини за да го избегнат плаќањето на данокот од 18 отсто, па така на пример на муштериите што нарачуваат за јадење во ресторанот, им го наплатуваат како да го нарачуваат за носење, за што даночната стапка е 5 отсто.
Мери Јордановска