ВМРО-ДПМНЕ како непринципиелни ги оценува изјавите за Регулаторната комисија за енергетика дадени на денешната прес-конференција на СДСМ и прашува со кое лице јавно говорат за енергетиката во Македонија.
– ВМРО-ДПМНЕ го потсетува СДСМ дека токму тие беа на власт кога решија да ја приватизираат ЕСМ, знаејќи дека оваа продажба ќе биде штетна за граѓаните, за што говореше и нивниот експерт Атанаско Тунески. Каде беа СДСМ кога во 2006 година и покрај масовните протести на народот ја продадоа ЕСМ, гледајќи на тоа како еден „бонбона бизнис”, се вели во реакцијата од ВМРО-ДПМНЕ на прес-конференцијата на Јани Макрадули од СДСМ.
Додека СДСМ владееше, се додава во рекацијата, се занимаваше само со сопствените бизниси во областа на енергетиката, а денес не е така.
– Сведоци сме на многу новитети во областа на енергетиката како донесување Закон за енергетика, овозможивме изградба на гасната централа ТЕ-ТО во Скопје, модернизација на ТЕЦ Битола, изградба на ХЕЦ Света Петка, модернизација на трафостаници на АД Мепсо, изградба на далноводи и многу други проекти, кои придонесоа за зајакнување на енергетскиот систем, се посочува во рекацијата.
ВМРО-ДПМНЕ најавува и натамошни активности во енергетиката со цел Република Македонија да не се соочува со проблеми од оваа сфера.