Пристигнува добра вест за сите гурмани – Сингапур ќе добие сопствено издание на Мишелинов водич за 2016 година.
За оние кои не се запознаени со овој систем на наградување, Мишелиновиот водич се смета за еден од најзначајните, најдобрите, најдоверливите и највлијателните водичи за ресторани и врвни готвачи во светот.
Рестораните се рангирани според ѕвездички кои ги доделуваат инспекторите, кои во тајност ги посетуваат угостителските објекти. Тие при дегустација на јадењата го оценуваат нивниот квалитет, вештината на подготовка на храната, степенот на креативност и оригиналност, цената на јадењето, како и лојалноста на посетителите.
Во создавање на сингапурското издание ќе учестува Туристичка организација на Сингапур во соработка со анонимни инспектори од Хонгконг, Јапонија, САД, Велика Британија и Шпанија, кои нема да ги оценуваат само рестораните, туку и уличната храна.