Чешкиот претседател Милош Земан во обраќањето на Генералното собрание на ОН го повика светот да се држи заедно против исламскиот тероризам, јави дописникот на МИА од Прага.
Земан тероризмот го спореди со канцер, кој во последниве години се проширил од шест на 35 земји во светот и повика на активирање на член 47 од Повелбата на ОН, кој предвидува формирање на воени сили на Обединетите нации.
– Ние мораме да се прашаме: Колку долго треба да чекаме? Колку долго сакаме да испраќаме само сочувства? Признавам дека дојде до некои дејствија за ограничување на тероризмот, но тоа навистина е малку и тероризмот се уште се шири, додаде Земан.
Чешкиот претседател предупреди на опасноста од создавање на нова исламска држава во Авганистан и оцени дека „талибанците се речиси исто толку сурови како и Исламската држава, Боко Харам или Ал-Каеда“.
– Постои потреба од координирана акција на сите постојани членки на ОН. Имаме потреба од платформа која би се посветила на меѓународниот тероризам, рече Земан потсетувајќи дека Индија тоа го побара уште во 2000 година.
Чешкиот претседател оцени дека не се потребни големи антитерористички операции туку „напад на нервните центри, а не на телото“.
Тој изрази сомневање во ефективноста на ОН и побара активирање на член 47 од Повелбата на ОН со повикот: „да го разбудиме членот на Обединетите нации“.
На крајот од говорот во ОН, чешкиот претседател го цитираше римскиот државник Катон Постариот со латинската фраза: „Картагина мора да биде уништена“.