Американскиот претседател Џозеф Бајден, германскиот канцелар Олаф Шолц и францускиот претседател Емануел Макрон можат да предизвикаат конфликт кој може да доведе до неповратни последици, изјави денеска претседателот на руската Дума Вјачеслав Володин на пленарната седница.
Тој, коментирајќи ги разговорите на тема напади врз руските градови што се водат на Запад, посочи дека за ова се залагаат или политичари во заминување или функционери кои веќе немаат голема поддршка од народот.
„Бајден, кој веќе замина, побегна од претседателската трка, Шолц, кој практично изгуби секаде и чија политичка иднина е нула, и Макрон, кого граѓаните на Франција исто така не го поддржаа. Денеска можат да предизвикаат конфликт што ќе доведе до неповратни последици. Ние и партиите, треба да направиме се тоа да не се случи“, објасни претседателот на Думата.
Володин силно предупреди дека „во случај на напад врз руски градови, ќе следи одговор“ и додаде дека „помоќното оружје е подготвено“.
„САД денеска, без срам, ја разгледуваат можноста да извршат напад на територијата на Руската Федерација, да разговараат (за тоа) со шефовите на европските држави, да разговараат со Украина, иако во Украина нема никој со кого да зборуваме за тоа, бидејќи сателитите им припаѓаат на САД и на земјите на НАТО, насочувањето и извршувањето на командите од високопрецизното оружје во тој случај ќе биде тесно поврзано со сателити“, рече Володин.
Тој додаде дека тоа значи дека војниците на НАТО директно ќе учествуваат во се.
„А тоа значи дека НАТО е целосно вовлечен во конфликтот и станува негов учесник. Разгледувањето на ова прашање може да доведе до најстрашни последици.
– Само замислете што мислат. Тие разговараат за нападите врз нашите мирни градови. Притоа зборуваат за тоа мислејќи дека тоа нема да ги погоди. Тоа не е така. Ние ќе одговориме. И имаме што да одговориме. Подготвено е уште помоќно оружје“, предупреди претседателот на Думата.