Портпаролката на руското Министерство за надворешни работи, Марија Захарова, изјави дека на европските елити им е потребен „непријател“ кого можат да го обвинат за своите проблеми и неуспеси.
Според неа, против Русија е започната кампања за клевета, поттикната од постојани провокации, фалсификати и отворени лаги, со цел да се оправда агресијата и да се канализира негативноста што се акумулира во општеството.
„Во услови на акутна социо-економска криза, на современите европски елити им е витално потребен непријател на кого можат да ги обвинат сите свои проблеми и да ги отпишат своите неуспеси. Обидите за воспоставување антируска, русофобична матрица на свеста низ целиот свет продолжуваат и важно е да се разбере дека нејзиното воспоставување и промоција траат со векови“, рече Захарова во интервју објавено денес од рускиот портал „Експерт“.
Како што изјави таа, евроатлантските престолнини сè уште сонуваат да ѝ нанесат стратешки пораз на Русија и се подготвени да направат сè за да ја исполнат оваа опсесија.
– Рацете на Западот го создадоа и го негуваа неонацистичкиот киевски режим, фиксиран на уништување на сè што е руско. Блицкригот против нашата земја не успеа, санкциите не успеаја, пумпањето оружје на киевските бандити не може да ја промени ситуацијата на фронтот, рече Захаров.
Портпаролката на руското Министерство за надворешни работи оцени дека нејзината земја, откако го преживеа распадот на СССР и 1990-тите, ја врати силата и го пронајде својот глас на меѓународната сцена и дека, без причина, се најде вклучена меѓу „оската на злото“.
„Само затоа што се осмеливме да имаме свое мислење, да го браниме нашиот суверенитет и да ја кажеме вистината за убиствените авантури на Западот во Југославија, Ирак, Либија, Сирија, Украина итн. Милиони луѓе станаа жртви на овие злосторства. Тоа е факт. Но, ако ги слушате западните политичари, чии раце се до лакти во крв, и печатот што го контролираат, тогаш е како ништо да не се случило“, рече Захарова.