За секој шести ученик во Велика Британија,или за 1,1 милион деца на училишна возраст,англискиот, кој е официјален јазик во земјата,не е и нивниот мајчин јазик-покажува истражувањето што го направи британското Министерство за образование.
Според податоците на Министерството,во јануари оваа година,преку еден милион деца,или 16,6 отсто од сите ученици,дома и со своите родители не зборуваат англиски,затоа што по потекло, тие не се Британци,туку и припаѓаат на некоја од етничките заедници кои се доселени во Велика Британија,како имигранти.
Таквата состојба е посебно видлива во Лондон и во источните делови од британскиот главен град.
Во градските основни училишта од јавното образование,каде учат деца од пет до 11 години,за 48 отсто од нив,англискиот јазик не е нивниот мајчин јазик.Тоа значи дека јазикот во земјата во која се родени, или во која сега живеат,како доселеници, е вториот што тие го зборуваат.
Најкарактеристички се лондонските општини Тауер Хамлетс и Њухам,каде има бројни етнички заедници на британски муслимани и Азијци.
Во овие делови од градот, дури за 75,3 отсто од децата на оваа возраст,англискиот не е нивниот мајчин јазик. Последниот попис на населението во 2011 година покажа дека во овие општини „домашните“ Британци стануваат малцинство во однос на доселеното население од странство,што се гледа и по нивното се поголемо вклучување во локалните власти и во работата на општините.
Висок процент на вакви деца и ученици е регистриран и во градови како Бирмингем,вториот по големина во Велика Британија,Лестер,Брадфорд,како и во делови од централна Англија,каде живее бројна муслиманска и азиска популација,како британски државјани,или како луѓе со обезбеден жителски статус.
Претставник на Министтерството за образование изјави дека овие деца,на завршните матурски испити,многу често покажуваат дека нивниот англиски е подобар од оној на децата и учениците на кои тој им е мајчин јазик.