Нова снимка од нередите во американскиот Конгрес се појави на социјалните мрежи, а на неа е забележан моментот кога беше пукано во 35-годишната демонстрантка Ешли Бебит, воена ветеранка од Калифорнија.
Во жената која беше смртно погодена, како што и претходно се претпоставуваше, пукал припадник на обезбедувањето, а сега се гледа и точно кој го повлекува чкрапалото.
Драматичната и вознемирувачка снимка од досега невиден агол, покажува како толпата се обидува да се пробие низ забарикадирана врата, додека од другата страна чекаат неколкумина вооружени обезбедувачи на Конгресот.
Бебит, според она што може да се види, во еден момент се качува на делот од вратата на кој е скршено стаклото, веројатно за да се обиде да скокне во забарикадираниот ходник, кога обезбедувачот со вперен пиштол го истрелува единствениот куршум, кој бил смртоносен за жената.
Само неколку секунди подоцна, откако се слушна истрелот, група специјалци во полна опрема пристигна на местото и го обезбедија, додека поголемиот дел од демонстрантите избегаа.
Во вчерашните нереди во Вашингтон животот го загубија четири лица, а според официјални извори, другите тројца починале од „итни медицински состојби“ за време на протестот на приврзаниците на Доналд Трамп.