Чешка на 15-ти февруари ќе биде домаќин на вонреден самит на Вишеградската група (В4), на што ќе се разгледуваат решенија за кризата со бегалците, најави на Твитер чешкиот премиер Бохуслав Соботка.
Како што јави дописникот на МИА од Прага, лидерите на владите на Чешка, Словачка, Полска и Унгарија, на состанокот ќе разговараат за подобра заштита на Шенген зоната и ќе разгледуваат евентуално создавање на „резервна“ гранична линија во Бугарија и Македонија.
Три дена подоцна, ќе се одржи самитот на ЕУ посветен на миграцијата.
Последната средба на шефови на влади на Вишеградската четворка (В4) се одржа во почетокот на декември минатата година во чешкиот главен град.
Тогаш беше договорено дека сите предлози за создавање на т.н. мини-Шенген се неприфатливи. Претставниците на В4 се изјаснија и против други директни или индиректни обиди за ограничување на слободата на движење во рамките на Европската унија.
Минатата недела, чешкиот министер за надворешни работи Лубомир Заоралек изјави дека Европа мора да има план Б во случај да не се случи намалување на приливот на бегалци.
Според него, во предвид доаѓа и поместување на граничните линии, кои ќе ги обезбедува Европа.
Најчесто се зборува за „резервна граница“ на линијата Бугарија – Македонија што според чешките политичари ќе значи де факто исклучување на Грција од Шенгенот.