Интервенциите на американската армија против групата Исламска држава (ИД) досега изнесуваат околу една милијарда долари и веројатно ќе достигнат сума од 2,4 до 3,8 милијарди долари годишно доколку офанзивата продолжи со досегашното темпо, покажува анализата на невладината организација Центар за стратешки и буџетски оценки.
Организацијата оценува дека трошоците би можеле да се зголемат и меѓу 13 и 22 милијарди долари годишно, доколку воените дејствија се зајакнат.
– Идните трошоци до голем степен зависат од тоа колку долго ќе траат операциите, колку е стабилно нивото на воздушните напади и дали ќе бидат распоредени дополнителни копнени сили, што е веќе планирано, се наведува во вчера објавената анализа.
Минатата недела американскиот министер за одбрана Чак Хејгел истакна дека Пентагон троши за операциите против ИД околу седум до 10 милиони долари дневно, сметајќи од 16 јуни, кога распореди свои војници, за да ја следат работата на ирачката војска и да ги советуваат нејзините команданти.