Водачот на еден еврејски, полигамиски култ, Гоел Рацон (64) е осуден од судот во Тел Авив на 30 години затвор, откако беше прогласен за виновен за повеќе сексуални кривични дела.
Рацон беше осуден за силување и за разни облици на сексуално насилство врз неговите сопруги и ќерки.
Промовирајќи го неговото уверување за оправданоста од полигамијата, што е составен дел од идеологијата на култот, што самиот го создал, тој живеел „во брак“ со повеќе жени. Од тие врски имало десетина помлади и повозрасни ќерки, со кои исто така имал сексуални односи.
Во текот на судењето, Рацон се бранел дека не сторил ништо лошо. Тој верува дека е „спасител на светот“ и се бранел дека сите жени со кои живеел во заедницата не биле насилно држени, туку дека сите тие тоа го правеле според сопствената воља.
Израелскиот обвинител во својот завршен збор во процесот, целиот култ и однесувањето и постапките на Рацон ги означи како „застрашувачка сага за доминацијата и измамувањето на вербата во Господ“.